Քոլէճի Պարախումբերը Լեռնալիբանանի Ախոյեան
Շաբաթ, 9 Մարտին, «Մոն Լա Սալ»ի բեմայարդակին վրայ, Ազգ. Ե. Մանուկեան Քոլէճի երեք պարախումբերը մասնակցեցան Լեռնալիբանանի միջ-դպրոցական պարի մրցանքին:
Արդարեւ, երկու ամիսներու վրայ երկարող փորձերէ ետք, քոլէճի երրորդ, չորրորդ եւ հինգերորդ դասարաններու պարախումբեր՝ քոլէճի պարի դասատու Տիկ. Անի Կոստանեանի բծախնդիր ու հետեւողական ջանքերուն շնորհիւ, անգամ մը եւս բեմ բարձրացան, հայ թէ օտար հանրութեան ներկայանալով Արդի, Արաբական ու Ռուսական պարերով:
Փոքրիկները ներդաշնակ, համաչափ ու ճկուն շարժումներով եւ ժպտուն ու ուրախ դէմքերով հմայեցին ներկայ հանդիսատեսները, արժանանալով անոնց ջերմ ծափահարութիւններուն ու դատական կազմի բարձր նիշերուն:
Ուշագրաւ էր, որ հակառակ իրենց փոքր տարիքին, աշակերտները ինքնավստահ շարժումներով կը կատարէին նոյնիսկ բարդ պարադրումներն ու պարային շարժուձեւերը:
Մրցանքի աւարտին, տեղի ունեցաւ մրցանակաբաշխութիւնը:
Բաժակով վերադառնալը տարիներէ ի վեր, արդէն աւանդութիւն դարձած էր մեր պարախումբերուն համար:
Երրորդ դասարանի պարախումբը՝ Ռուսական պարով, հանդիսացաւ «Երկսեռ-Փոքր» պարախումբերու ախոյեան. հինգերորդ դասարանի պարախումբը՝ Արաբական «տապքէ» պարով, հանդիսացաւ «Աղջկանց-Փոքր» պարախումբերու ախոյեան. Իսկ չորրորդ դասարանի պարախումբը՝ « Արդի- Ճէզզ» պարով, հանդիսացաւ երկրորդ: