Ազգ.  Ե.  Մանուկեան  Քոլէճի՝

«Աւանդական  Տօնավաճառ»-ի  Բացում 

Երեքշաբթի, 9  Դեկտեմբերի  առաւօտեան  ժամը  10:30-ին,  Սիրան  Մանուկեան  սրահին  մէջ  տեղի ունեցաւ  Ազգ.  Ե.  Մանուկեան  Քոլէճի Տիկնանց  Յանձնախումբի  կազմակերպած «Աւանդական  Տօնավաճառ»-ի  բացման  պաշտօնական  հանդիսութիւնը,  նախագահութեամբ՝  Տիկ.  Սալբի Գասպարեանի:

Տօնավաճառի  բացման  ժապաւէնը  կտրուելէ  ետք,  խօսք  առաւ  Քոլէճի  Տիկնանց  Միութեան  ատենապետուհի՝  Տիկ.  Նայիրի   Ադամեանը:  Ան  նախ  բարի  գալուստ  մաղթեց  ներկաներուն  ու  իր  խօսքին  մէջ  ըսաւ,  թէ  Տիկնանց  միութիւնը՝   յենուելով  դպրոցի  ծնողներուն  ու  բարեկամներուն  բարի  կամքին  ու  աջակցութեան,  փորձած  է    աւանդական  տօնավաճառին  ընդմէջէն,  այս  տարի  եւս,   տօնական  ուրախ   ու  աշխոյժ  մթնոլորտ   ստեղծել  դպրոցէն  ներս:

Ան  շնորհակալութիւն  յայտնեց  տիկնանցի նախկին անդամ՝ Տիկ.  Սալբի Գասպարեանին, որ սիրայօժար ընդունած է տօնավաճառի նախագահութիւնը:

Ապա,  ան  հրաւիրեց  Քոլէճի  տնօրէն՝  Պրն.  Զօհրապ  Ղազարեանը,  եւ Տիկ.  Սալբի Գասպարեանը,  միասնաբար  հատելու՝  քոլէճի  նշանակը  կրող  կարկանդակը:

Տեղի  ունեցաւ  հիւրասիրութիւն,  որուն ընթացքին   մանկապարտէզի  աշակերտները հանդէս եկան ամանորի երգերով ու արտասանութիւններով:

Ապա, ներկաները  առիթը  ունեցան  այցելելու  տօնավաճառի   սեղանները, ուր  ճաշակաւոր  կերպով  տեղադրուած  էին՝   Հայկական  զարդանմոյշներ, գեղանկարներ,   կաղանդի  յատուկ  կողովներ,  ձեռագործներ,  հայկական  գինի,  չոր  մրգեղէն, խաղալիկներ  ու    նուէրի  յարմար  այլազան իրեր:

Նշենք,  որ  տօնավաճառը  բաց  է  ամէն  օր,  ժամը  10-էն  3:00,  մինչեւ  Ուրբաթ,  12  Դեկտեմբեր  եւ  իւրաքանչիւր օր, քոլէճի Նախակրթարանի կարգերէն աշակերտներ ներկաներուն պիտի հրամցնեն ամանորի ու Ս. Ծննդեան երգեր, արտասանութիւններ ու նուագ: